Filem ‘Renai’ digaga beserimbai enggau Hari Gawai Dayak, Pesta Kaamatan taun tu

Beserimbai enggau Hari Gawai Dayak enggau Pesta Kaamatan taun tu,PETRONAS bejadika sebuah filem (webfilm) pandak 3 minit dikumbai ‘Renai’ ti digaga di Bario, Sarawak enggau Gunung Kinabalu, Sabah apin lama udah.

Filem pandak ‘Renai’ nya dikeluluka seiku nembiak mit indu ke benama Renai, ti nusui cherita iya kenyau ari mit nyentuk ke besai, ke mayuh endar peneka lalu baka ni iya meri terima kasih ke pengawa dikereja apai indai iya ti deka meda anak mit nya nyadi orang ke menyana jemah.

Cherita bekaul enggau peragam ati ke meri terima kasih enggau pengingin sesiku peneka dalam filem pandak tu mega mandangka penaluk ngagai pengerami Hari  Kaamatan enggau Gawai Dayak, ke bulih asil ari pemagas sida ti bulih padi ninting taun.

“Enggau filem ‘online’ Kaamatan sereta Gawai baru tu, kami (PETRONAS) ngarapka ukai semina mandangka pengeraja sereta penyelai ‘Pesta Menuai’ di Sabah enggau Sarawak tang reti adat enggau pengerami tu ke semua rayat Malaysia,” ku Menijer Besai Kanan Komunikasyen Strategik Kumpulan PETRONAS, Zahariah Abd. Rahman lebuh ti mai raban media meda dulu filem pandak ‘Renai’ di China House, Rumah Kort Lama ditu,bedau lama udah.

Sama bisi enggau ngulu program nya, Menijer Besai Opis Markit Jenama, Raban Komunikasyen Strategik PETRONAS, Rizan Ismail sereta rintai pelakun baka Anastazia Uding Bala (Renai maya ke agi mit) enggau Lydiawati Bujang (Renai lebuh iya udah besai), Emilyn Sinangsi Ayu (indai Renai) sereta Julian Lian Bala (apai Renai) nyengkaum direktor, Philip Rom Kulleh.

Zahariah nandu baru, PETRONAS mega bulih penemu ngaga filem pandak ‘Renai’ ari tetiap iku rayat Malaysia ke bisi cherita ke manah sereta nyelai.

“Aku berasai temegah ati laban jalai cherita tu digaga staf PETRONAS empu, iya nya mantaika reti penyerakup antara pupu bansa.

“Kami mantaika cherita sebuah ruang bilik ke alai apai indai ngiga pemisi ba endur ke enda sebaka, iya nya di Sarawak enggau Sabah ngemesaika anak sida, iya nya Renai ti nempuh penusah nya ti pengujungka iya,nyadi orang ke mujur.

“Nya alai, cherita ‘Renai’ tu mandangka mayuh macham adat menua kitai adat ke ulih beserak enggau bansa bukai, kelimpah ari penyerakup pengawa rama di rayat Malaysia,” ku iya.

Ba aum media nya mega, Philip madahka filem pandak ‘Renai’ ti digaga nyadi filem dalam timpuh seminggu di Bario enggau Gunung Kinabalu bisi penyelai kediri empu, ti nyerita pemagas sereta penyiru sebuah ruang bilik.

“Dalam cherita tu, nya mandangka pasal sesebengkah hari besai ti disempulang enggau jaku ajar sereta moral ari cherita tu,” ku iya madah lebuh dikerandau ditu.

Iya madahka diri puas ati enggau filem pandak ti digaga nya lalu ngarapka ulih deka meri lalau ke manah ngagai komuniti kitai.

“Semua pelakun ke enggau ngaga filem pandak tu, orang baru magang tang sida udah ngaga pengawa sida enggau manah,” ku iya.

Mensia mayuh ulih meda filem pandak ‘Renai’ belabuh ari 26 Mei ba (saluran rasmi)  PETRONAS www.petronasoffical.comwww.petronasoffical.comwww.petronasoffical.comwww.petronasoffical.com .

Taja pia, ba sebengkah agi dalam televisyen, nengah komersial televisyen pengelama 60 saat, filem pandak nya deka dibantaika belabuh ari 29 Mei tu.

Pemenang betuah ari pekit ‘Hitz.fm Kaamatan & Gawai Experience with PETRONAS’ deka diberi peluang ngasaika pengerami musin ngetau di Sabah enggau Sarawak.

Borneo post