Sepuluh iku kabinet menteri penuh dipelaba ngangkat sumpah sehari tu

KUCHING: Sepuluh iku kabinet menteri penuh betuaika Kepala Menteri Datuk Patinggi Tan Sri Adenan Satem disadang ngangkat sumpah sehari tu.

Nitihka berita ke ulih dipechaya, 10 iku menteri nya nyengkaum Adenan, Datuk Amar Abang Johari Tun Openg, Tan Sri Dr James Jemut Masing, Dato Sri Wong Soon Koh, Dato Sri Michael Manyin, Datuk Amar Awang Tengah Ali Hasan enggau Datuk Fatimah Abdullah.

Tiga iku ketuai baru ke dipasuk dalam rintai baru kabinet iya nya presiden SUPP Datuk Dr Sim Kui Hian, Datuk Amar Douglas Uggah enggau Datuk Dr Stephen Rundi.

Diberitaka mega Tan Sri William Mawan nadai dalam rintai kabinet serak tu. Iya ke mega Kaban Parlimen (MP) Saratok disadang dichiri nyadi menteri ba perintah besai, nganti penuduk Uggah ke pulai meri servis di nengeri tu.

Ngenang kaul ke sama, diberitaka mega kabinet menteri ke baru serak tu, deka bisi tiga iku sapit kepala menteri.

Tiga iku menteri penuh ke diberita mangku tanggungpengawa nyadi sapit kepala menteri iya nya Abang Johari, Masing enggau Uggah.

Uggah nganti ex-sapit kepala menteri Datuk Patinggi Tan Sri Alfred Jabu Numpang lalu Mawan ke enda dipasuk dalam rintai kabinet baru disadang nyilih penuduk Uggah, engka ba opis menteri bukai.

Opis Kepala Menteri ngenukuka pengawa ngangkat sumpah kabinet menteri ke baru deka diatur di Kunsil Nengeri (DUN) Baru sehari tu, jam 3 lemai.

Beratika kabinet baru nya, ketuai dalam PBB tebal agi nguasa kabinet ke alai ari 10 menteri penuh, parti nya bisi 7 iku ketuai.

Parti dalam serakup BN bukai bela bisi seiku pengari, iya nya Masing (PRS), Wong (SPDP) bepelasarka berita gempung entara UPP enggau SPDP sereta DR Sim (SUPP).

Enti berita dua iku ketuai ari PBB nyadi sapit kepala menteri nya amat, pekara nya mandangka PBB enda ngenah parti bukai dalam serakup enggau lurus kelebih agi enti kepala menteri ari PBB.

Lalu pia mega enti pinta enam iku chalun terus BN, Mawan (Pakan), Rosey Yunus (Bekenu), Paulus Palu (Batu Danau), Miro Simuh (Serembu), Dato Gerawat Gala (Mulu) enggau John Ilus (Bukit Semuja) nyereta PBB diterima parti, reti nya PBB ngembuan 46 penuduk DUN ari 82.

Ketegal nya, nadai agi ‘check n balance’ entara parti dalam serakup pengudah PBB nguasa penuh BN Nengeri.

Tu mandangka pengujung atur bekunsi kuasa entara parti dalam serakup, pia mega mandangka penegap PBB ke nyadi seiti parti ke bekuasa di Sarawak,

Kabinet dulu agi ari tu bisi semilan iku menteri penuh nyengkaum Adenan.

Nitihka konstitusyen nengeri, Sarawak bisi hak ngembuan 10 iku menteri penuh kelimpah ari kepala menteri.

Borneo post