Gerempung Ukai Dikuasa Perintah (NGO) Dayak minta piak bekaul bejalaika pansik silik sereta nangkap enggau pengelengkas orang jai ke nimbak mati aktivis Dayak niang Bill Kayong, 43.
Semua 13 NGO Dayak sepenemu madahka, laban ulah orang jai nya enda masuk akal ke lalu meri pengeringat tauka pemedis ati ngagai raban bansa Dayak laban nya baka ti nyuluk sarang tebuan sereta nguji penegap Dayak.
“Kami deka madahka pemati niang Bill Kayong tu ukai mati ngapa. Iya ninggalka dunya nyadi bujang berani Dayak. Sekumbang ke idup, niang tu endang seiku orang ke bebendar ngetanka Dayak lalu iya deka seruran dikenang tauka dikeingatka raban bansa Dayak.
“Kami minta raban bansa Dayak ngambika anang guai ransi sereta enda bejalaika undang-undang kediri empu.
“Kami minta piak polis bejalaika pansik enggau silik sereta nangkap orang jai nya enggau lengkas,” ku Presiden SDGA Dr Dusit bejaku ngarika semua 13 NGO Dayak dalam sebengkah aum pengarang berita ditu, lemai kemari.
Semua 13 NGO nya baka Sarawak Dayak Graduates Association (SDGA); Serakup Dayak Iban Sarawak (SADIA); Dayak National Congress (DNC); Dayak Emergency Respons Team (DERT); SDNU; DBNA; BGA; Aum Besai Machan; BISA; PEDAS; Aum Besai Dayak; Kaban Lama 2.0 enggau Barisan Iban Sarawak (BIS).
Raban NGO Dayak nya bepenemu, pemedis seiku Dayak nya diasaika semua bansa Dayak, lalu NGO Dayak deka terus bejalaika pengawa ngenegapka hak raban bansa.
Nitihku raban NGO Dayak, niang Bill seiku aktivis ti chakah pasal Tanah Adat Bansa Asal (NCR) di kandang menua Baram, Miri sereta Niah.
“Kami deka terus kering sereta tegap. Nuan negu seiku (reti iya) nuan negu semua, nuan negu seiku Dayak nuan negu semua Dayak, nuan negu peranak Sarawak nuan negu serata Sarawak,” ku raban nya.
Berebak enggau tu semua NGO Dayak nya meri penyinu ati ngagai niang Bill sebilik.
Kelimpah ari nya, NGO Dayak ti minta orang mayuh enda ngaga spekulasyen awakka polis ulih bejalai pengawa enggau silik.
“Kami minta semua anang ngaga spekulasyen kediri empu tang patut meri kerejasama ngagai polis, awakka kitai nemu sapa orang jai nya.
“Kitai minta raban bansa Dayak terus besampi ke niang lalu minta enggau meri awak ngagai piak polis ngereja pengawa sida,” ku raban tu ke meri penerang begulai kemari.
Entara ke bisi datai ngagai aum pengarang berita nya kemari, Presiden SADIA Sidi Munan, Presiden DNC Mengga Mikui, Sapit Presiden DNC Datuk John Tenewi Nuek enggau ke bukai.
Pagi kemari, Bill Kayong ke nyadi Sekretari PKR Pampang Miri mati ditimbak lebuh ti ngetu ba lampu trapik di mua palan bebeli barang Emart di Tudan, Miri.
Niang ke nyadi Sekretari Persatuan Dayak Sarawak (PEDAS) dipelabaka nurun gawa ari rumah ngagai endur gawa iya di pusat bandar.
Bill seiku ari chalun PKR ke bediri minta pilih nyatup BN ba sitak DUN Bekenu, ba pengawa bepilih nengeri Ke-11, apin lama.
Kelimpah ari nya, Presiden PEDAS Kapten (B) Collin Imran lebuh ditelefon Utusan Borneo kemari madah, pemati Bill Kayong deka ngangkatka penegap runding ba pengawa ngetanka hak Dayak.
Ku iya, kitai enda ngenggaika ensiden nya endang meri pengeringat ngagai bala kaban sereta bakih tang tetap meri kuasa ngagai polis enggau piak bekaul bejalaika pansik dikena ngenukuka orang jai nya ditangkap.
“Pemati nuan nyadika penegap runding tauka semengat kami neruska pengawa ngetanka hak kitai enggau keadilan,” ku iya.
Borneo post
Tiada ulasan:
Catat Ulasan
Sendiri Tulis Sendiri Tanggung Ya, Penulis Blog Tidak Bertanggungjawab Ke atas Implaksi Perundangan Yang Dikenakan Oleh Pihak Berkuasa Ke atas Mana-mana Ulasan Yang Menyalahi Perundangan Yang berkuatkuasa