Sekali agi piak polis minta orang mayuh lebih agi ke meda penyadi kes timbak mati niang Bill Kayong di Miri, datai meri penerang ngagai piak polis.
Kepala Polis Sarawak, Datuk Mazlan Mansor madah, kes nimbak mati niang Bill Kayong nya kes ti chukup dikemeratka lalu semua orang ke meda penyadi tu dipinta meri kerejasama.
“Aku ngarapka raban bansa tauka mensia mayuh ulih meri semua penerang ke bekualiti ngagai piak polis, dikena bejalaika pansik kes tu.
“Chara bejalaika pansik tu aku enda nerangka strategi kami. Tang nama ke ulih dipekunsika aku, kami deka nganggauka saksi ke ulih mantu dalam bejalaika pansik tu,” ku iya.
Mazlan mansutka pekara nya lebuh dikerandau ba sebengkah aum pengarang berita ba Indu Opis Polis Kontijen Sarawak ditu, lemai kemari.
Berebak enggau tu, iya madahka Pasukan Khas udah ditumbuh awakka bejalaika pansik silik kes di Miri nya, lalu Pasukan Khas nya beetuaika Kepala Opis Nasat Pengawa Jai Sarawak SAC Dev Kumar.
“Baka ke udah ditemu kitai, sebengkah Pasukan Khas udah ditumbuhka ti bejalaika pansik pasal kes bunuh di Miri (ensanus), lalu pansik benung chakah dipejalaika.
“Semua elemen dalam CID, PRDM dikemeranka sereta ari Bukit Aman mega udah datai mantu bejalaika pansik tu.
“Piak forensik mega benung mansik enggau silik ba endur penusah nya nyadi sereta ngiga nama bukti ke ulih ditemu,” ku iya nyaut lebuh ditanya sekalika bisi barang bukti bukai bisi ditemu.
Orang mayuh ti bisi meda penyadi kes nya dipinta jampat telefon ngagai IPD Miri Ops Room 085-433730 / 085-433400 tauka ngagai Pemesai Penasat ASP Lee Chee Keat ba lumur 012-3436388.
Polis mega ngelalau orang mayuh sereta bala bakih niang Bill Kayong enda nempa sebarang spekulasyen pasal motif kes nya.
Pagi ensanus, Sekretari PKR Pampang Miri, Bill Kayong mati ditimbak semak orang ti enda dikelala lebuh niang nya benung ngetu ba lampu trafik semak palan bebeli barang Emart, di Tudan, Miri.
Bill Kayong, 43, mati ditimbak ba endur penusah nya nyadi ke nembus cheremin kerita iya lalu kena rekung sepiak kanan (baruh pending kanan).
Ba penusah ke nyadi urung 8.30 pagi nya, niang nya deriba ke diri empu ngena kerita Toyota Hilux dalam pejalai ari rumah iya di Desa Senadin nuju ke opis di tengah mengeri nya.
Kelimpah ari nya Mazlan lebuh ditanya bekaul enggau kes ke nyadi di Bau iya nya seiku lelaki ari Balai Ringin ti kena timbak enggau bakihka iya ari Kpg Sg engkabang Serian, iya madahka, nya kes timbak ti enda disengaja.
Borneo post
Tiada ulasan:
Catat Ulasan
Sendiri Tulis Sendiri Tanggung Ya, Penulis Blog Tidak Bertanggungjawab Ke atas Implaksi Perundangan Yang Dikenakan Oleh Pihak Berkuasa Ke atas Mana-mana Ulasan Yang Menyalahi Perundangan Yang berkuatkuasa