Unit Pekara Kelimpah Ari Islam ditumbuh: Uggah

Opis ke mangku betanggungpengawa nyaga pengarap ke ukai bekaul enggau Islam udah numbuhka siti unit ke diberi nama Pekara Kelimpah Ari Islam ari baruh kemata Opis Sapit Kepala Menteri, Datuk Amar Douglas Uggah anak Embas.

Di Sarawak, opis ke mangku betanggungpengawa nyaga pekara bekaul enggau Islam endang lama udah ditumbuhka, iya nya Opis Agama Islam, tang unit baru, Pekara Kelimpah Ari Islam tu baru ditumbuhka.

Aum bekaul enggau pekara nya kemari, ti keterubah diperambu Kepala Menteri Datuk Patinggi Tan Sri Adenan Satem, baka ke udah dipadah iya maya Aum Kunsil Nengeri (DUN) bedau lama tu tadi.

“Aku diberi tanggung pengawa nyaga unit Pekara Kelimpah Ari Islam lalu tau dipadahka kitai sejarah ke Nengeri Sarawak laban ngembuan unit ti baka tu,” ku Uggah.

Uggah ti mega nyadi Menteri Pengawa Betanam Betupi Moden enggau Ekonomi Menua Pesisir madah, unit tu timbal ari perambu kedua raban ukai Islam lalu nyadi singkang baru ke menua tu, ngambika Sarawak terus ngembuan penyerakup dalam pengarap ke datai ari mayuh macham pupu raban bansa.

“Unit tu deka nyadi sebagi ari penegap Perintah Nengeri beratika pengarap, ke alai pupu raban bansa di Sarawak tu deka terus diintu sereta dikemaju laban penyerakup bansa tu beguna amat ngambika Sarawak majak mansang, kelimpah ari Kepala Menteri deka nyapai visyen nempa Sarawak nyadi sebuah nengeri ke beserakup, likun sereta mansang,” ku iya.

Sebedau meri nama unit nya kemari, seraban 20 iku tuai pemesai pengari ari mayuh macham pupu bansa sereta pengarap ke ukai Islam baum enggau Uggah ba opis iya kemari, ti tebal agi bejuraika proses konsultansi.

“Kami baum enggau pengari ari palan jalai pengarap ke ukai bekaul enggau Islam, kelebih agi la-ban unit tu baru, kami betanya dulu ngagai semua pengari ari mayuh macham pupu bansa sereta jalai pengarap ke nadai kaul enggau Islam, bakani ku gaya tusun unit tu ila.

Aum nya kemari bela digulu Sapit Sekretari Perintah Nengeri Datu Ose Murang, Pegawai Tadbir Khas Opis Sapit Sekretari Perintah Nengeri Datu Jaul Samion, Direktor Unit Penga-tur Pengawa ba Opis Kepala Menteri Michael Dawi Alli.

Ngarika palan jalai pengarap di nengeri tu, iya nya Sapit Chairman ACS sereta Bishop Kuching ngarika Gerija Anglika Sarawak, Archbishop Datuk Bolly Lapok, Presiden BEM & Chairman ACS (Borneo Evangelical Mission) Rev Dr Justin Wan, Archbishop of Kuching (Gerija Roman Katolik) Archbishop Dato John Ha, pengari ari Gerija Methodist ngarika Dato dr Su Chii Ann, Rev Lau Hui Ming, Sekretari Besai ACS Ambrose Linang, Sapit Presiden (SDA Sarawak) Pastor Joggevy anak Gelu, Sekretari Malaysian Hindu Sangam, Balachandran Annamalai, Chairman Palan Sai Baba Prof Narayanan, Tukang Wang Gerempung Kuil Hindu Vijayakumar, Presi-den Kuil Sikh Sarawak Dr Kalwinder Singh Khaira, Chairman Gerempung Malaysian Buddhist pampang Sarawak Datuk Dr Tay Chin Kin enggau Chairman sereta Mandal Chairman Spiritual Assembly of Bahai Sarawak, Chin Chia Chau enggau Dajai Mancha.

Semua pengari ari palan jalai pengarap ukai Islam tu ngenataika terima kasih ngagai Kepala Menteri laban udah numbuhka unit tu.

“Semua pengari palan jalai pengarap ukai Islam tu ngasaika unit tu beguna amat, lalu nyadi sejarah ke nengeri Sarawak laban keterubah endar kitai kala bisi unit tu, lalu nambah enggau nya mega, tetiap iku kitai ngasaika kitai tu endang orang Sarawak,” ku iya.

Uggah ti mega ADUN Bukit Saban madahka unit tu mungkur jalai pengarap Kristian, Sikh, Hindu, Buddhist enggau Taiost ke deka nyadi platform forum besai, laban mayuh pekara sen-sitif sereta pekara bukai bekaul enggau pemansang dalam pekara ukai bekaul enggau Islam di Sa-rawak deka dipejuraika, lalu udah nya ila unit tu mega deka nyadi jematan penegap kaul enggau Islam, ngambika penyerakup di Sarawak deka terus diangkat ti pulaika pengelantang rayat di nengeri tu,” ku iya.

Nangkanka tu ila, raban nya nyengkaum Uggah empu deka nemuai meri basa sereta betemu enggau Kepala Menteri seraya meri terima kasih ngagai iya ketegal udah numbuhka unit tu.

Borneo Post