Anang enda ngaga ripot enti raban penyukat tanah NCR minta bayar

Bala tuai rumah dipinta ngaga ripot polis nyema bisi orang ari opis perintah minta bayar dikena ngatur pengawa nyukat kelinggi Tanah Adat Bumiputera (NCR).

Pemesai Opis Tanah enggau Servei Kapit Peggy Ronin Edin madah, ba baruh atur nyukat kelinggi nya, semua puku bepun ari pengawa nyukat nyentuk mansutka pala tanah NCR endang ari perintah magang.

“Semua tu nadai bebayar magang. Nyema kita bisi dipinta mayar, kita tau ngeripot ngagai polis tauka madah ngagai opis kami (Opis Tanah enggau Servei),” pia ku iya madah.

Iya mantaika jaku lalau nya maya pengerami Ngiling Bidai enggau pengawa nyuaka gazet tanah (Seksyen 6 Sarawak Land Code) ke diatur ba Rumah Ijau Sibat ba Nanga Mukeh, Katibas, Hari Lima tu tadi.

Sama bela bisi datai maya tu iya nya Kaban Parlimen Kapit ti mega Sapit Menteri Pemansang Menua Pesisir Datuk Alexander Nanta Linggi enggau Pemesai Opis Pelilih Song Jackline August.

Jaku lalau ke dipansutka Peggy maya tu bepun ari bisi ninga beberapa iku tuai rumah madahka pengawa nyukat kelinggi nya bisi bebayar.

Ku iya, bala tuai rumah tau betanya ngagai peranak rumah panjai ke bukai ti iya ke udah nyukat tanah sida nengah program bantu perintah nya.

Berindik ari pekara nya, Peggy empu deka nyaup ngaga ripot polis nyema peranak Rumah Ijau Sibat, Rumah Kutak Mugang enggau Rumah Leo Sana ba Nanga Mukeh bisi dipinta bebayar.

Dulu agi ari tu, iya bisi madah, 60 bengkah endur di Kapit nyengkaum 17 iti di pelilih Song udah nerima pemendar alai ngatur pengawa nyukat kelinggi nya.

“Ari 17 bengkah endur di Song semilan bengkah udah tembu di sukat.

“Lima bengkah endur udah digazet nengah Seksyen 6 Sarawak Land Code iya ke renggat keterubah ari dua iti renggat sebedau diberi pala tanah NCR,” ku iya madahka baru.

Ba pengerami nya, Alexander dipebasa nyuaka gazet tanah ngagai 16 iku penerima.

Borneo post