Sarawak deka beratika lumba enggau main ke nyendiaka mayuh agi midul ngambika ulih nyadi champion ba Lumba enggau Main Malaysia (SUKMA) 2016.
Tagit Sarawak deka nyadi champion ngalahka nengeri ke seruran tegar ba SUKMA iya nya Selangor enggau Terengganu, ku Menteri Muda Nembiak enggau Lumba Datuk Abdul Karim Rahman Hamzah.
Atlet ke ngarika Sarawak ku iya, patut belumba enggau naka ulih laban tu peluang ke pengabis manah ngagai Sarawak nyadi champion, ku iya.
“Kepenudi kitai (Sarawak) kala nyadi champion iya nya dalam taun 1994.
“Lalu kitai enda patut ngelakka iya bansa nya aja laban sekali tu, endur bepekit, besemekih ba menua kitai empu, kelimpah disukung Perintah Nengeri enggau rayat Sarawak.
“Enti kita (atlet) ngasaika kita ditu ba penuduk lumur dua tauka tiga, tu hari ke pengabis manah laban lumba engga main tu dibai ke Sarawak.
“Aku pechaya tim Sarawak ulih ngaga pengabis manah lalu nyadi champion,” ku iya.
Iya madah munyi tu lebuh dirandau ba lobi Komplek Kunsil Nengeri pengujung pengawa Beradat Mungkal Aum Kunsil Nengeri Penggal Keterubah kena 8 Jun di Komplek DUN ditu, kemari.
“Taja pia, agi bisi penyendia bukai ke patut digaga kami ba sekeda lumba enggau main, kelebih agi ba sentang undang-undang sekeda lumba enggau main ke udah diubah…Nyangka bisi tiga tauka empat,” ku iya.
Ba penyikap bukai ku Abdul Karim nya, bekait enggau undang-undang, alai undang-undang ke bisi diatu ngemendarka atlet nasional nyereta SUKMA.
“Enti iya bansa nya, iya deka ngachau peluang kitai, lalu bisi sekeda atlet ke udah dipilih ngarika Malaysia ungkup Lumba enggau Main Olimpik di Rio-de-Janeiro.
“Enti sida iya udah nyengala diterima enggau olimpik tu, Opis Menteri Lumba enggau Main Malaysia enda ngemendarka sida iya nyereta SUKMA ti deka digaga di Kuching dalam bulan Julai tu ila,” ku iya.
Abdul Karim nandu, tim atlet ari Sarawak dijangka deka besemekih ba lumba enggau main ke bisi nyendiaka tga ngagai empat midul, lalu sekeda lumba enggau main nyendiaka manggai 30 midul.
Ungkup atlet ke datai ari Semenanjung Malaysia lebih agi sida iya ke baru nemuai kitu. Ku Abdul Karim:
“Aku ngelaluka sida beratika empu pengidup Sarawak, lalu ukai semina kitu ketegal lumba enggau main…Peratika pendiau pengidup kami di Sarawak,” ku iya.
Kelimpah ari nya, Abdul Karim madahka pengudah Aum Kunsil Nengeri tu ila, iya enggau sekeda raban penyakal deka nemuai ngagai genap sitak menua di Malaysia, laban deka ngelakuka SUKMA 2016.
“Abis Aum Kunsil Nengeri tu ila, aku enggau sekeda raban penyakal deka nemuai ngagai Brunei sereta sitak menua bukai di Semenanjung. Aku mai penyakal lalu aku mega bisi mai sida maya pengawa muka SUKMA nya ila.
“Pengawa lumba enggau main, enda ibuh dichampur enggau penemu politk. Iya ke bendar, aku diatu benung berandau enggau sida DAP, lalu sekeda ari YB sida bisi udah madah sida iya deka nyereta aku ba pengawa tu,” ku iya.
Borneo post
Tiada ulasan:
Catat Ulasan
Sendiri Tulis Sendiri Tanggung Ya, Penulis Blog Tidak Bertanggungjawab Ke atas Implaksi Perundangan Yang Dikenakan Oleh Pihak Berkuasa Ke atas Mana-mana Ulasan Yang Menyalahi Perundangan Yang berkuatkuasa