𝗕𝗜𝗡𝗧𝗨𝗟𝗨 | Perintah Sarawak netapka pemutus enda ngemendarka meri lisin nyabung manuk maya Gawai Dayak taun tu.
Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, iya udah minta Sekretari Perintah Sarawak enggau Opis Residen enda meri lisin nyabung manuk, nyema bisi peminta.
“Minta ampun, aku udah minta Sekretari Perintah Nengeri enggau Opis Residen enda ngemansutka lisin nyabung manuk.
“Semua rayat di nengeri tu meseti besaup, enda ngerami Gawai Dayak taun tu baka taun ke udah-udah,” pia ku iya maya aum media udah ke mending penerang bekaul enggau gaya pandemik COVID-19 di Sitak Bintulu ba sebuah hotel ditu, kena Hari Tiga.
Ba aum media nya mega, Kepala Menteri minta bala tuai raban bansa enggau tuai rumah bejalaika atur operasyen standard (SOP) ke terit dikena nyeliah pengelekai COVID-19 maya Gawai Dayak tu ila.
Kelimpah ari nya, iya mega muji pengeransing ke udah dikereja Komiti Penyangga Penusah Sitak (JPBB) Bintulu ngatur macham bengkah chara dikena nagang pengelekai COVID-19 ba sitak nya.
Sumber | EDISI UKAS
