Bujang Senang

Bujang Senang

16 Nov 2016

Sarawak begunaka RM10 bilion dikena mekal ai beresi


Nengeri tu randaka ungkus sepenyampau RM10 bilion dikena nyikap 100 peratus ruang bilik ngambika dibekal ai beresi manggai ba taun 2025.
Menteri Perengka Guna Mensia Mayuh Dato Sri Dr Stephen Rundi Utom madah,naka ke diatu urung 114,000 buah ruang bilik di Sarawak empai bisi bekal ai beresi lalu tebal agi ari sida betimbunka ai ujan kelimpah mega bisi ngena sistem graviti ngulihka ai.
“Penyampau ruang bilik ke empai bisi bekal ai iya nya 19.5 peratus ari semua penyampau rayat ba nengeri tu tauka 39 peratus ari sida iya nya ari menua pesisir,” pia ku iya maya berandau enggau pengarang berita, kilah ensana.
Iya mantaika penerang nya maya ditanya penyampau berapa buah enggau peratus ruang bilik di nengeri tu ke empai bisi nerima bekal ai beresi naka ke diatu.
Iya ti mega Kaban Kunsil Nengeri (ADUN) Kemena madah, opis menteri iya bisi numbuhka program Bekal Ai Alternatif Sarawak (SAWAS) dikena mutarka penanggul menua pesisir ti empai disambung paip ai beresi ketegal empai datai jalai.
Ditanya penyampau ruang bilik ke udah diberi program SAWAS ungkup taun tu, Rundi madahka SAWAS semina baru diperambu empai lama tu tadi enti dibanding enggau Skim Bekal Karan Alternatif Menua Pesisir Sarawak (Sares) ti udah berengkah digaga taun seiti tadi.
“Program tu deka berengkah digaga taun ti deka datai lalu ungkus program dipelanja perintah besai enggau perintah nengeri,” ku iya nerang.
Nambahka nya ku iya,sida melabaka SAWAS diperambu deka mai penguntung ngagai urung 1,400 buah ruang bilik ba taun 2017 ngena ungkus RM161 juta.
Rundi madah, SAWAS sebengkah ari projek ke diperambu digaga nengah Langgur Pemansang Malaysia Ke-11 (RMK-11).
“Menua ke deka digagaka SAWAS tu deka ditentuka pengudah Aum Kunsil Nengeri ti deka datai,” pia ku iya madahka baru.
Bajet 2017 ke dibantai Menteri Besai Datuk Seri Najib Razak empai lama tu tadi mandangka ungkup ungkus bekal ai iya nya sepenyampau RM500 juta dikena napi penanggul bekaul enggau ai di serata Malaysia.
Taja pan baka nya, bajet nya nadai madahka penyampau diungkupka ngagai nengeri tu.

0 komentar: