Bisi 4,690 lot tanah ungkup orang sesiku ke udah disukat nengah Seksyen 18 Kod Tanah Sarawak sekumbang program nyukat hak tanah bumiputera nengah inisiatif baru, ku Menteri Muda Pengatur Pengeraja Asal enggau Rampa Menua Datuk Mohd Naroden Majais.
Nyaut tanya Kaban Kunsil Nengeri (ADUN) Krian Ali Biju rambau Aum DUN Ke-18 penggal keterubah kemari, Naroden madah pengawa nyukat lot tanah orang nya diadu ba 24 kandang endur sereta mungkur tanah pemesai urung 4,892 hektar.
“Program nyukat tanah adat bumiputera inisiatif baru digaga nengah dua renggat ke alai ba renggat keterubah bepun ba taun 2010, kitai meratka pengawa nyukat kelingi lalu 248,167 hektar udah mujur disukat.
“Renggat kedua patut dipungkal ba taun 2016 tang Opis Tanah enggau Penyukat (JTS) ngepunka pengawa nya tumu lalu meratka kereja nyukat lot ungkup sesiku orang.
“Ungkup kandang endur ke udah digizit nengah Seksyen 6 asil ari pengawa nyukat renggat keterubah, penyampau 4,690 lot tanah orang sesiku udah disukat ba 24 kandang endur lalu mungkur pemesai 4,892 hektar,” ku iya.
Naroden nambah kereja nyukat lot individu deka seruran dipajak ke alai penyampau RM50 juta udah disedia perintah dikena ngemujur program nyukat hak tanah adat bumiputera inisiatif baru ungkup 2014 enggau 2015.
Nyaut tanya tandu ari Ali ba pekara ke bekaul enggau tanah ke disukat nengah Sekesyen 6, Naroden madah pampas sigi deka dibayar ba tanah ke udah diakun nyadi tanah adat enti tanah nya diambi perintah ungkup pengawa pemansang.
“Ungkup sida ke ngempu tanah, enti tanah nya diambi perintah bayar pampas deka diberi ungkup rumah sereta utai tanam ba atas tanah nya,” ku iya.
Borneo post
0 komentar:
Catat Ulasan