Sarawak udah besedia alai ngatur SUKMA XVII Sarawak 2016 ke deka diatur berengkah 22 Julai nyentuk 31 Julai.
Chairman Komiti Pengatur pengatur SUKMA Tan Sri Mohamad Morshidi Abdul Ghani madah, semua bengkah pengawa ke diatur ba tikas ti manah dikena mandangka perintah nengeri tu ulih ngatur lumba enggau main nya enggau manah sekali agi.
“Kepenudi kitai nyadi nengeri alai ngatur SUKMA iya nya 26 taun ke udah lalu maya nya kitai dipeda orang mujur nyadi tuai rumah.
“Kitai ngarapka pemujur nya suba ulih ditandu baru serak tu,” pia ku iya madah.
Iya ti mega Sekretari Nengeri mantaika jaku nya ba aum media sepengudah dipebasa mantar pengawa bejadi Stadium Tertutup Sibu ditu, kemari.
Sama bela bisi datai maya aum media tu iya nya Menteri Raban Nembiak, Lumba enggau Main Datuk Abdul Karim Rahman Hamzah.
Nambahka nya, Morshidi madahka perintah nengeri udah bekenaka puku urung RM400 juta dikena ngaga perengka guna lumba enggau main nyengkaum ‘Akuatik’, ‘Boling Padang’, ‘Menembak’, Skuasy, Hoki enggau pengawa nyeruri Stadium Sarawak.
Iya mega maya tu madah, naka kediatu hotel udah abis dibuking kelimpah bisi nyiwa ‘homestay’ enggau perengka pengangkut siwa.
“Kelimpah rayat nengeri tu empu kitai mega deka meda mayuh bala kaban belayan atlit datai ngagai Sarawak maya tu ila nyengkaum bala atlit ari menua Brunei,” ku iya madahka baru.
Pengawa bejadi SUKMA XVII Sarawak 2016 deka dipenyadi Tuai Pemegai Menua (TYT) Tun Abdul Taib Mahmud kena 23 Julai ba Stadium Sarawak enggau Menteri Besai Datuk Seri Najib Tun Razak dipebasa bejadi pengawa nutup lumba enggau main nya kena 31 Julai.
SUKMA XVII Sarawak 2016 serak dibagi ngagai 19 iti bengkah pekit diatur di Kuching enggau Samarahan, dua iti di Sibu enggau tiga iti di Miri.
Borneo post
0 komentar:
Catat Ulasan