Pemesai Pelilih Mit Menua dilalau nulis bup pasal pelilih mit menua ke endur sida gawa ti nyerita sejarah, adat sereta sekeda jerita lama.
Kepala Menteri Datuk Patinggi Tan Sri Adenan Satem madah Sarawak tu mayuh ngembuan sejarah ti tau di tulis lalu digagaka bup.
“Ukai semina nulis pasal sejarah Sarawak ke kala dipegai ulih ruang bilik ‘Brooke’ tang jerita bukai ke kala nyadi sebedau jeman Brooke,”ku Adenan.
Sejarah Sarawak antara sejarah menua ke pemadu manah sereta mayuh ke enda dirikod laban semina ditusui nengah jerita orang ke tuai-tuai kelia.
Ku Adenan baru, jerita ke ditusui orang tuai kelia ti enda dirikod, tau digumpul lalu ditulis nyadi bup, laban nya deka nyadi jerita ke nyelai sereta manah.
“Mayuh macham bup ke ulih ditulis kitai pasal sejarah Sarawak baka seiku British Admiral ke betapi enggau penanggul di tasik lalu kapal iya ngetu di Siniawan. Pia mega ni asal penatai nama Sarawak , lalu baka nya mega enggau nama genturung pendiau Senari.
“Semua endur sereta nama tu bisi sejarah kediri empu,” ku Adenan madah bapengerami bejadika bup ‘The Story behind the villages in Lundu District’ (Jerita asal genturung pendiau di Pelilih Menua Lundu) di sebuah hotel ditu, kemari.
Baka di Miri, Sibu enggau Bintulu tentu bisi utai ke nyelai ke tau ditulis lalu digagaka bup.
“Baka nama Kuching, kada enda nama Kuching nya datai ari buah mata Kucing,ti ngujungka bandaraya Kuching di kangau enggau nama Kuching,” ku Adenan.
Baka Lundu ku iya, sebuah pelilih mit menua di selatan Sarawak ngembuan rampa menua ke asal.
“Peda aja Santubong nyentuk ke Tanjung Datu, ai tasik iya chiru sereta ngembuan rampa menua ke chukup manah. Penyauh ari Bandaraya Kuching semina sejam lebih aja ari enti kitai nepan kerita nengah tebing tasik.
“Lundu enda taun enda disagu laban mayuh orang datai ke Lundu ketegal dagang temuai. Tau dipeda nengah bup sejarah bekaul enggau Lundu,” ku iya.
Bup ‘The Story behind the Villages in Lundu District ‘ ditulis seiku ex-Pemesai Pelilih Mit Lundu, ti mega nyadi Sekretari (Sulit) Kepala Menteri diatu, Azmi Bujang.
Azmi madahka pengerindu iya bekaul enggau sejarah menua nya empu sereta pekara ke bekaul enggau sejarah ke memanah udah matak pengerindu narit iya nulis pasal penyelai ke bisi ba genturung pendiau di menua nya, ngambika ditemu mensia mayuh. Nya nyengkaum asal genturung pendiau tradisional ke bisi dalam bup sejarah di pelilih mit Lundu.
“Bup sejarah ti ditulis bekaul enggau genturung pendiau di pelilih mit Lundu tu endang bepelasarka peneleba aku ke kala gawa nyadi DO di Lundu dalam kandang lima taun tu ke udah,” ku Azmi seraya madahka diri udah ngumpul semua penerang pasal sejarah ba nyauka semua genturung pendiau di Lundu, nyengkaum gambar ti ulih dipandangka dalam bup sejarah nya.
Sama bisi ngulu pengerami nya kemari, Menteri Muda Seni enggau Main Asal, Datuk John Sikie Tayai, Speaker Kunsul Nengeri Datuk Amar Asfia Awang Nassar, Menteri Muda Ekonomi Kandang Menua Pesisir enggau Pengawa Berikan Datuk Mohd Julaihi Nahrawi, Menteri Muda Pemansang Nembiak, Lumba enggau Main Datuk Abdul Karim Rahman Hamzah sereta Menteri Muda Pengawa Betanam Betupi Malcolm Mussen Lamoh (kanan).
Borneo post
0 komentar:
Catat Ulasan