Bujang Senang

Bujang Senang

27 Mei 2016

Kaban TERAS sepenemu deka minta masuk PBB


Parti Tenaga Rakyat Sarawak (TERAS) naka ke diatu bedau dikinsil, nyentukka peminta nyadi kaban Parti Pesaka Bumiputera (PBB) enggau parti komponen BN diputuska.
Pemangku Presiden TERAS, Datuk Peter Nansian Ngusie madah, sebedau tu iya ti kala nyebut parti nya deka dikinsil, nya pemutus iya kediri aja.
“Sebedau tu aku kala madah deka nginsil parti tang nya semina penemu tauka pemutus aku kediri.
“Sehari tu (kemari) kami bisi aum Komiti Eksekutif Pusat (CEC), kami ngaga seiti pemutus. Lalu pemutus ke digaga maya baum CEC iya nya kaban parti kami deka sereta bebala mayuh minta masuk PBB.
“Kami (kaban TERAS) deka sereta bebala mayuh minta masuk PBB, lalu pekara pasal parti deka bepanggai ba pemutus peminta kami. Pemutus kami (TERAS) deka digaga lebuh datai ba maya ke patut,” ku iya.
Nansian mansutka pekara nya dalam aum pengarang berita, pengudah nyadi chairman aum CEC TERAS ke diatur ba Indu Opis TERAS ditu, pagi kemari.
Bejaku baru, iya madahka TERAS bisi 25,000 iku kaban ari mayuh pupu bansa ti mungkur 24 pampang di serata Sarawak ti direjista.
“Kami deka ngumpul semua peminta nyadi kaban PBB dalam dua minggu, udah nya pinta deka dianjung sebedau ujung bulan Jun.
“Lalu kaban TERAS ke ukai Bumiputera tau milih bagi parti komponen BN bukai,” ku iya.
Borneo post

0 komentar: