Bujang Senang

Bujang Senang

24 Mei 2016

Rayat patut terus ngemeranka semangat kerejasama


Menteri Muda Dagang Temuai Datuk Lee Kim Shin ngarapka semangat kerejasama entara rayat terus dikemeran dikena nentuka pemaik rayat pupu bansa ditu.
Ku iya, rayat di nengeri tu tebilang rita siruka pangan diri sereta bekerejasama ngereja pengawa.
“Kitai ditu nadai ngira bansa enggau jalai pengarap ulih begulai sereta bekerejasama enggau pangan diri.
“Pia mega, semangat bebasaka pangan diri patut terus dikemeran dikena ngetanka pengelantang ke diasaika diatu,” ku iya.
Lee ke mega nyadi Kaban Kunsil Nengeri (ADUN) Senadin mantaika jaku nya rambau Pengerami Merarau Beserimbai Pengerami Gawai diatur Gerija Parish of The Good Shepherd Lutong (PGSL) ditu kemari.
Sama bisi datai ADUN Piasau Datuk Sebastian Ting, Ketuai Indu Parti Rakyat Sarawak (PRS) Dato Sri Doris Brodie, Chairman Parti Rakyat Bersatu Sarawak (SUPP) Pujut Adam Yii, Pemancha Wilson Siang, Vicar gerija PGSL Fr. Donald Jute, Pemantu Vicar Fr. Johny Janggok, Warden Gerija Chambai Bangga sereta kaban komiti gerija ke bukai.
Ba kenang bekaul enggau pengerami nya, Lee berasai gagit deka terus begulai enggau bala komuniti ngintu bemacham pengerami ke bisi diatur nyengkaum pengerami Gawai.
“Ba awak tu mega aku deka meri besai terima kasih ngagai komuniti ditu ke udah meri sukung ngagai aku enggau ADUN Piasau mega ngambika terus gawa ngagai rayat,” ku iya.
Dulu agi ari nya, Fr. Donald dalam jaku pengelalu iya madahka, tuju pengerami keterubah diatur kena ngintu pengerami Gawai begulai enggau kaban gerija sebedau sida mulaika diri ke menua.
“Kelimpah ari nya, pengerami tu mega kelai meri basa ngagai kaban gerija enggau temuai ke bisi dikanggau ti seruran meri bekerejasama sereta sukung,” ku iya.
Gerija tu mega bela ngatur Gawai Thanksgiving Service muak ke pagi.
Lebih 100 iku kaban gerija bisi ngulu pengerami merarau nya ti bela mantaika bemacham tanda kelimpah ari dinahka pemakai asal menua tu.
Borneo post

0 komentar: