Bujang Senang

Bujang Senang

21 Nov 2016

Rayat pesisir diperansang meretika Bajet Nengeri


Sapit Kepala Menteri, Datuk Amar Douglas Uggah Embas meransang peranak di nengeri tu kelebih agi peranak entigis ngambi meri perati sereta meretika Bajet Nengeri 2017 ti dibantai maya Aum Kunsil Nengeri (DUN) ke berengkah sehari tu (21 Nov), laban pemerat iya bekaul enggau menua pesisir.
Bejaku rambau Pengerami Makai Lemai Ninting Taun Serakup Kayan Sarawak (PKS) ba Hotel Meritz malam Hari Enam, Uggah madah pekara ti dikemerat dalam bajet tu iya nya chara Kepala Menteri Datuk Patinggi Tan Sri Adenan Satem tauka Tok Nan ngamatka semaya mutarka pekara-pekara penyeranta peranak di entigis.
Uggah madah, semaya rambau Pengawa Bepilih Nengeri (PRN) enda dilengka sereta Bajet 2017 dibantai nampung pengawa perintah bejalaika pemansang ngagai rayat.
“Dalam pekara tu, komuniti Kayan ti nyadi antara tiga bansa pemadu seranta di Sarawal, patut meretika bajet tu.
“Serenih lalu mereti, laban tu ukai retorik tang pekara ke nyengala deka digaga dalam timpuh lima taun ke deka datai.”
Uggah ke nyadi Menteri Betanam Betupi Moden enggau Ekonomi Menua Pesisir nampung, penanggul ke besai ditapi peranak menua pesisir iya nya suntuk ba infrastruktur, penyikap perengka guna pemun enggau pelajar.
Nya alai ku iya, seiti langkar besai diguna kena nentuka perintah enda ngelaung dalam bejalaika pemansang di menua entigis.
“Langkar besai tu meseti ngundan lis kandang menua ti balat begunaka pemansang kelebih agi di menua entigis enggau tanah tinggi. Tu beguna endar ngambika pejalai program pemansang di kandang menua nya mujur.”
Ba lansa ke bukai, Uggah mega mantaika pengasa diasaika Tok Nan ba pengawa peminta hak nengeri tu.
“Tok Nan udah naka ulih berandau enggau Menteri Besai Datuk Najib Tun Razak bekaul enggau peminta tu.
“Taja pekara tu enda dibantai maya DUN sekali tu, tang kitai Optimis pekara tu dipesetuju sereta ulih diputar maya betemu enggau Najib,” sempul iya.
Uggah meri jamin alai Tok Nan meruan bebendar ngambi pulai baru hak-hak Sarawak.

0 komentar: