Aum Kunsil Nengeri ti deka berengkah ari 21 nyentuk 30 November tu ila, deka digulu kededua piak parti, perintah enggau penyakal. Perintah Nengeri Sarawak pechaya diplomasi chara engkeman mutarka Sempekat Malaysia 1963 (MA 1963) lebuh berandauka pekara tu enggau Perintah Besai, ku Kepala Menteri Datuk Patinggi Tan Sri Adenan Satem.
Adenan madah kena 12 Nov tu tadi, Menteri Besai Datuk Seri Najib Tun Razak lebuh nemuai ke Kota Kinabalu madahka iya besedia deka bejuraika pasal MA 1963 sereta Konstitusyen Perintah Besai ke seruran ngasuh saru.
Menteri Besai udah madah, iya ngembuan runding ke tebuka, lalu nadai deka ngambi hak orang Sabah (maya nemuai ngagai Sabah bedau lama tu tadi) tang seruran ngembuan runding ke tebuka nyaga hak menua nya,” ku Adenan.
Iya madah munyi nya lebuh bejaku ba aum media, pengudah nyadi chairman aum ke MKT Parti Pesaka Bumiputera Bersatu (PBB) sereta aum pra-aum Kunsil Nengeri di sebuah hotel ditu, kemari.
Dalam konteks Sarawak ku iya, proses ke dikumbai Nurunka Kuasa benung dipejalai enggau tuju ngemeratka pekara nya sereta mutarka penanggul mensia mayuh pasal pekara nya, kelebih agi pasal kuasa menua tu ke nyau majak punas ari baruh MA 1963 sereta ke udah ditulis dalam konstitusyen, ti nyadi atur ke Sarawak (lebuh nya) lebuh begempung enggau Federasyen Malaysia.
Beratika utai ke dipadah Menteri Besai nya, iya nadai penanggul dibai berandauka pasal pinta kitai. Nya alai enda ibuh kitai mantaika resolusyen tu ba aum Kunsil Nengeri, minta hak kuasa kitai pulai baru bekaul enggau konstitusyen nya.
Arapka Menteri Besai ngaga pengawa nya ke kitai, laban iya nemu nya pekara ti dikemeratka kitai. Nya alai, naka ke diatu kitai tau enda ibuh mantaika resolusyan tu di dalam Aum Kunsil Nengeri,” ku iya.
Betatika pinta Sarawak pasal peluang pengawa ba Petronas, Adenan madah nyauka semua pekara nya udah dikeamatka, iya nya nyiri peranak Sarawak nyadi Direktor dalam Kaban Kaunsil Petronas ke lama lalu Petronas sedia deka nambahka mayuh agi penyereta ari Sarawak di renggat pangku pengawa nyadi pemesai di serata menua lalu Petronas udah milih urung seribu iku peranak Sarawak diambi gawa di serata menua enggau renggat antarabansa.
Sebarang pengawa deka ngemanahka agi gaya sereta kaul Petronas enggau Perintah nengeri mengkang dipejalaika, amat nya lubah tang udah ditetapka.
Diatu penemu nya udah nyata endar antara Petronas, Perintah Besai enggau Perintah Nengeri,” ku iya.
Sebedau nyadi chairman aum tu, Adenan mega udah nyadi chairman aum MKT (Majlis Kerja Tertinggi) PBB lalu antara pekara ke udah diputuska, iya nya Ketuai Pampang PBB, ke ukai Kaban Kunsil Nengeri (ADUN) enda tau enda nyerahka penuduk sida iya nyadi ketuai pampang, diserahka pulai baru ngagai ADUN, ku iya.
Kami udah madah ngagai Kaban Parlimen (MP) Jemoreng Datuk Wahab Dollah enggau ex-ADUN Beting Maro, Datuk Bolhassan Di mulaika pangku pengawa sida iya nyadi ketuai pampang PBB ngagai ADUN sitak nya ke diatu.
Nya atur ke udah lama digaga parti,”ku Adenan.
Kena 23 Oktober tu tadi, Adenan ba siti aum media di Bintulu madahka Perintah Nengeri deka mantaika perambu bekaul enggau pinta Sarawak mulaika hak menua tu ba aum DUN ti deka datai.
Iya madah pereambu nya betatika pemerat Perintah Besai ngamatka sempekat ungkup hak Sarawak baka ke udah ditulis dalam MA 1963, Ripot Komiti Antara Perintah (IGC) 1963 enggau Ripot ari Suruhanjaya Cobbold 1962.
0 komentar:
Catat Ulasan