Divisyen Pertama Infantri Malaysia (1 Divisyen) enggau Opis Hal Ehwal Veteran (JHEV) ba renggat nengeri Sarawak terus chakah besaup ngiga raban veteran kelebih agi Iban Treker di serata nengeri tu.
Panglima Divisyen Pertama Infrantri Malaysia, Mejar Jeneral Datuk Stephen Mundaw madah, sebengkah tim ngiga veteran Iban Treker ditumbuh ngambika ulih nyidi pendiau sereta nentuka bantu ke patut.
Nitihku Stephen, raban iya begulai enggau JHEV deka ngiga dulu veteran Iban Treker, udah nya baru ngiga veteran Sarawak Ranger di nengeri tu.
“Kami 1 Divisyen begulai enggau JHEV ba renggat Nengeri Sarawak deka majakka pengawa ngiga veteran ke bedau ditemu kitai lalu kitai deka mantu sida enggau naka ulih. Ke dulu digiga kitai diatu iya nya veteran Iban Treker.
“Baka ke dipadahka ngagai aku bisi 12 iku veteran ditemu di Lubok Antu, lalu aku deka betemu enggau raban nya, tang aku arap bendar agi mayuh raban veteran tu diau di menua ulu baka di Kapit, Sibu, Limbang, Lundu enggau ke bukai.
“Aku minta sereta nesau rayat mayuh sereta raban gerempung veteran ke nemu endur sida diau anang enda madah ngagai aku sereta Direktor JHEV, ngambika kami ulih ngiga sereta betemu enggau veteran tu,” ku iya.
Stephen mansutka pekara nya lebuh dikerandau raban pengarang berita pengudah pengawa besembiang ba Pendam Bujang Berani ditu, kemari.
Iya madah, pengawa besembiang nya diatur beserimbai ngintu pengerami Genap 50 Taun (Jubli Emas) Divisyen Pertama Infantri Malaysia enggau Hari Bujang Berani 2016.
“Dua aktiviti diatur kami sehari tu (kemari) iya nya keterubah ngingatka bujang berani tu udah berambun nyawa ngetanka menua lalu kedua iya nya aktiviti pengerami nyambut Genap 50 Taun (Jubli Emas) 1 Divisyen.
“Sehari tu (kemari) aku amat gaga ati laban mayuh kitai ulih datai kitu nyengkaum dua iku veteran Australia ti sama ngingatka bujang berani kitai, taja pan diatur ngena chara mit,” ku iya.
Dua iku veteran Australia iya nya Bob Nugent enggau Ros Blug Briansen ti gawa berambun nyawa di Borneo ari taun 1966 nyentuk maya konfrantasi.
Maya enggau Unit Infantri, Bob seduai Ros enggau tiga iku agi ke bukai beperang enggau kominis, lalu tiga ari sida iya parai kena timbak.
Dikena ngingatka nya, sida ngengkahka batu pengingat ba Pendam Bujang Berani.
0 komentar:
Catat Ulasan