SEMATAN: Sekretari Perintah Nengeri Tan Sri Datuk Amar Mohammad Morshidi Abdul Ghani netapka perintah udah setuju nambah penyampau soldadu wataniah.
Nengah atur nya, Iya ke mega Komander Rejimen 511 Soldadu Wataniah madah maya manggai ba taun 2020, penyampau soldadu wataniah di nengeri tu deka bela enggau penyampau soldadu tetap.
“Berindik enggau nya, aku ngambi peluang tu ngansak semua bala soldadu wataniah meransang bala diri sebilik nyereta soldadu volunteer (wataniah) ngambi juluk tu ulih dijapai,” ku iya.
Iya mansutka jaku tu ba pengawa baris nutup Latih Kem Ninting Taun Siri 1/2016 Rejimen 511 Soldadu Wataniah di Kem Sematan Lundu, kemari.
Iya nambah juluk soldadu wataniah manggai ba taun 2020 iya nya meratka atur ngenegap modal mensia sereta latih.
Kelimpah ari nya, Morshidi mega ngelalau soldadu wataniah seruran nyadi mata enggau pending ngagai soldadu darat lalu ngeriput sebarang pekara ke tau ngeruga pengelikun menua.
“Aku pechaya kita semua deka diining sekeda raban ketegal ti ngembuan pengelandik sereta peneleba ba pengawa soldadu.
“Aku enggai meda kita pechaya enggau jaku asut sekeda raban ke ngembuan juluk enda manah,” ku iya.
Baris ke diatur di padang kawad Kem Sematan kemari dikemujur 29 iku pemesai enggau 591 soldadu bemacham pangkat.
Ba pengawa nya, Morshidi bisi mega ngelekat tanda pangkat ngagai 31 iku soldadu wataniah.
Tanda perang enggau ‘Gerak Tempur’ bisi mega dipandangka raban soldadu wataniah rambau pengawa kemari.
Bela datai Menteri Muda Pengerai Mensia Mayuh Datuk Dr Jerip Susil, Sapit Komander Rejimen 511 Soldadu Wataniah Ding Tiew Wong enggau pemesai bukai.
BP
0 komentar:
Catat Ulasan