Raban nembiak nengeri tu nadai kebuah enda nyukung penemu Kepala Menteri Datuk Patinggi Tan Sri Adenan Satem ke ngena atur moratorium ngagai semua peminta permit raban pengereja pengawa Petronas ke datai ari luar Sarawak.
Kaban Kunsil Nengeri (ADUN) Tupong, Fazzrudin Abdul Rahman madah kebuah Adenan ngena moratorium ba semua permit kereja ke pengereja pengawa Petronas ke datai ari menua luar ari Sarawak, laban beratika rayat Sarawak empu ke patut dikemeratka dulu.
“Kami ngarika raban nembiak nyukung penuh penemu Kepala Menteri nya ke ngena moratorium ba semua permit kereja ke pengereja pengawa Petronas ke datai ari menua luar ari Sarawak, laban Adenan ngemeratka nasit rayat Sarawak lebih ari orang bukai,” ku iya.
Iya madah munyi nya lebuh dikerandau pengudah bejadika Program Duta Nembiak Kimia (YAC) ti digaga beserimbai enggau Konferens Antarabansa IUPAC dalam pekara bekait enggau Pelajar Kimia (ICCE) di Sekolah Menengah Sains Kuching Utara (SAKURA) ditu, kemari.
Minggu seiti nyin tadi, Sapit Kepala Menteri Datuk Amar Douglas Uggah anak Embas ba seiti aum enggau Petronas, berindik ari pemutus Perintah Nengeri ngeluarka ‘moratorium’ ba semua permit pengawa ke baru, ba pengereja pengawa ke ukai ari asal menua Sarawak.
Berindik ari ‘moratorium’ nya, pekara tu narit ati mensia mayuh bakani Perintah Menua Sarawak udah mantaika ‘moratorium’ mandangka Perintah Menua Sarawak serius ngemutarka penanggul antara Petronas enggau Perintah Menua Sarawak.
Ba randau nya mega, Fazruddin mega ditanya indeks pengawa salah ke majak nyadi ba sitak Petra Jaya, enti sema indeks pengawa salah nya, bisi ngerampit ngagai sitak Tupong tauka enda.
Ku iya, sebuah raban pengereja pengawa (Task Force) KRT di sitak nya udah numbuhka pampang nya, kena ngemutarka pengawa salah, enggai ke ngerampit sitak nya mega.
“Kami di sitak nya, bisi muka ‘Task Force’ ke bekerejasama enggau PDRM, Rela, komuiti dia sereta seruran (membuat pematauan) enda nitihka jam tetap.
“Sigi bisi ‘Task Force’ dibuka di Tupong ke bekerejasama enggau polis, Rela, enggau Komuniti sereta KRT sama mantu ngemunaska pengawa salah,” ku iya, lalu nambah baru penyampayu KRT di sitak Tupong manggai urung lebih 20 buah.
BP
0 komentar:
Catat Ulasan