Sapit Kepala Menteri Datuk Amar Douglas Uggah Embas madahka perintah nadai udah nerima sebarang penemuai tauka penerang berkaul enggau isu pengereja pengawa Petronas di Sarawak.
Iya madah, Perintah Nengeri tegap enggau pemutus enda ngemendarka peminta permit gawa ti mungkur pengereja pengawa Petronas ke ukai asal Sarawak ke deka gawa di nengeri tu.
“Bedau (nerima penemuai Petronas), aku sehari tu di Lundu ditu (bejalaika pengawa). Naka ke diatu nadai nerima penemuai (sida betemu enggau perintah). Sekalika sida datai tauka enda aku enda nemu.
“Kami (perintah) nganti penatai sida sereta meri penerang,” ku iya.
Dulu ari nya Uggah ti mega Menteri Betanam Betupi Moden enggau Ekonomi Menua Pesisir nyuaka ‘Tunai Elaun Sara Hidup Nelayan’ ngagai Germpung Orang Berikan Kandang Menua (PNK) Sematan/Lundu ke diatur ba Dewan Gerempung Chung Hua, Sematan ditu kemari.
Dalam ripot surat kabar kemari madahka Petronas deka meri penerang ngagai perintah nengeri pasal status pengereja pengawa sida di Sarawak ditu kemari.
Nitihku penerang Uggah di Kota Samarahan ba sebengkah pengerami, iya madah nya berindik ari perintah ti enda ngemendarka meri permit gawa ngagai pengereja pengawa Petronas ke ukai asal ari nengeri tu.
“Kami sedia mendingka penerang pasal status pemadu baru pengereja pengawa Petronas di Sarawak,” ku iya madah ngagai pengarang berita ensanus.
Sama nyempulang Uggah lebuh dikerandau raban pengarang berita kemari, Menteri Muda Ekonomi Menua Pesisir (Kandang Menua Pesisir) enggau Kebun Bedandang Besai Datuk Francis Harden Hollis, Menteri Muda Ekonomi Menua Pesisir (Kandang Pesisir enggau Pengawa Berikan) Datuk Julaihi Narawi enggau Sekretari Mendam ba Opis Menteri nya, Datu Dr. Ngenang Jangu.
0 komentar:
Catat Ulasan