Barisan Nasional (BN) Sarawak ulih menang lebih ari 72 penuduk rambau Pengawa Bepilih Nengeri Ke-11 (PRN11) nyema penanggul entara parti komponen enggau pemambar nya ulih diputar tumu agi.
Menteri Pengatur Pengeraja Asal enggau Rampa Menua Kedua, Datuk Amar Awang Tengah Ali Hassan madahka BN ulih menang pengabis nadai dua ngagai tiga penuduk kelimpah ari ngambi baru menua Ba’Kalalan.
Ku iya, BN alah ba Kunsil Bepilih Nengeri (DUN) Ba’kalalan ketegal chalun ke dipilih enda engkeman.
“Kitai ulih menang ba Ba’Kalalan nyema kitai nyabung chalun ti bisi potensial ke majoriti dikerindu bala pengundi ba konstituensyen nya.
“Tang chalun ke dipilih bediri dia ukai dikedekaka pengundi,” ku iya rambau dirandau pengarang berita pengudah ngulu pengerami ‘Malam Sekalung Budi Seikhlas Penghargaan’ ba sebuah hotel tebilang ditu malam kemari.
Ngenang silik, Tengah ke mega Mandal Presiden Kanan Parti Pesaka Bumiputera Bersatu (PBB) mantaika pasal alah ba kandang menua bukai bakai baka Krian, Pelawan enggau Pujut ketegal pekara dalam parti komponen ke pambar ti ngumbai diri ‘BN Friendly’.
“Krian, Pelawan, enggau Pujut, kitai ulih menang tang semua nya bepun ari penanggul dalam parti komponen.
“Nya alai, enti sema penanggul tu ulih diputar tumu agi, BN Sarawak endang ulih menang ngelui 72 ari 82 penuduk ke diperebut,” ku iya.
Ditanya sentang pemujur iya ba Bukit Sari, ku Tengah, rayat agi ngelempaika pengandal ngagai iya terus nyadi pengari ba konstituensyen nya.
Ku iya, pemujur rambau PRN11 tu tadi nyadi pemujur ti kedua kali menang darat, pengudah tujuh penggal nyadi pengari rayat.
Lebuh ti bejaku dulu ari nya, iya meri terima kasih ngagai semua ti bekerejasama nentuka pemujur BN menang ba pengawa bepilih.
Ku iya, ‘Adenan Power’ udah nyaup mai pemujur besai BN Sarawak ngulihka majoriti lalu nentuka diberi ‘mandat’ sekali agi numbuhka perintah.
Pia mega pengawa media chelak enggau elektronik bela ngerembaika penerang betul lalu ngenegapka agi pengandal rayat sereta enda mudah mendingka raban penyakal tauka sebarang raban ke seruran bemain enggau ‘politik persepsi’ nengah propaganda negatif.
Sama bisi datai, Speaker DUN Sarawak, Datuk Amar Mohamad Asfia Awang Nasar, Menteri Mudah Pengatur Pengeraja Asal, Datuk Mohd Naroden Majais enggau Menteri Muda Pemansang Industri, Puku enggau Promosyen, Datuk Julaihi Narawi.
Borneo post
0 komentar:
Catat Ulasan