KUCHING: Kaul rat entara Opis Kepala Menteri (CMO) enggau media ngelama ke udah deka dipajak tegap agi, ku Sekretari (Sulit) Kanan Kepala Menteri, Azmi Bujang.
Bejaku rambau pengerami Makai Lemai CMO enggau media ke diatur ba sebuah hotel ditu malam ensanus, Azmi ngakun sukung ari raban media ungkup tetiap pengawa ke diatur CMO chukup manah.
Iya meri puji ngagai raban media ketegal ti udah meri sukung ba semua pengawa enggau program ke diatur CMO, kelebih agi ke bisi digulu kepala menteri.
“Dalam timpuh 3 taun ke udah nyentuk ngagai pengawa bepilih, mayuh pengawa ke diatur udah dipansutka ba media.
“Kenyau Adenan mangku pengawa kepala menteri, kaul entara CMO enggau media majak rat.
“Aku ngarap sukung tu ulih diratka agi ungkup timpuh lima taun ke deka datai,” ku iya.
Pengerami malam nya digulu semua pengari ijinsi media chelak enggau elektronik ke bisi di nengeri tu.
Azmi nambah, sukung nya udah nyaup nyadung berita pengawa perintah ngagai mensia mayuh.
Ngenang kaul ke sama, iya mega ngelalau raban media ngemeran chara kereja ke manah lalu enda mansutka berita sengapa.
“Naka ke diatu, berita ke dipansut ba media (chelak enggau elektronik) sigi manah lalu sigi ulih dipechaya.
“Enda baka media rama ti tebal agi enda ditemu pengamat. Ketegal nya mega Adenan enda kiruhka berita ke ayan ba media rama, enti disaut pekara nya nadai pengujung,” ku iya.
Ngarap kitai sekali agi ulih ngadu kerejasama rat, bela sejalai nengah Tim Adenan, tandu Azmi.
Borneo post
0 komentar:
Catat Ulasan