Bujang Senang

Bujang Senang

4 Ogo 2016

PKR Sarawak nyukung KM minta kuasa dipulai


Parti Keadilan Rakyat (PKR) Sarawak meri sukung penuh  ngagai Kepala Menteri Datuk Patinggi Tan Sri Adenan Satem ba pengawa berunding enggau perintah besai bekaul enggau peminta nyerahka kuasa.
Chairman parti nya, Baru Bian mega madahka PKR Nengeri sanggup mantu perintah enda ngira bakani chara ke ulih, tang iya minta Kepala Menteri patut nadai belalai madahka batang aum nya.
Kelimpah ari meri awak ngagai PKR nengeri nimbal, laban runding peminta nyerahka kuasa nya mungkur hak rayat sereta nentuka kuing rebak jemah ila, ku iya.
Nitihku Baru, baka ke ditemu mensia mayuh Kepala Menteri sebedau tu madahka runding autonomi enggau Perintah Besai udah datai ba renggat kedua sereta penyulut nya amat dikemegahka.
“Tang kami deka nanya lebuh Adenan apin lama madahka iya patut meri ‘amaran’ enti (perintah besai) enda mujur ngamatka autonomi ti disemayaka.
“Nya engka semina penerang ngagai mensia mayuh ari Kepala Menteri tauka mai reti Perintah Besai ngamatka semaya baka ti dipadahka Menteri Besai (Datuk Seri Najib Tun Razak) lebuh bekimpin maya pengawa bepilih nengeri apin lama,” ku iya.
Bejaku baru, ‘amaran’ dipadahka Adenan nya mai reti bisi pekara ti enda ‘manah’ nyadi pasal runding nya.
Iya mansutka pekara nya dalam aum pengarang berita ti sama bisi digulu mandal chairman PKR negeri See Chee How, Ketuai Raban Orang Indu PKR Sarawak Nurhanim Mokshen enggau Chairman PKR Pelagus Joshua Jabeng, ke diatur ba Indu Opis PKR nengeri ditu, kemari.
Baru ke mega Kaban Kunsil Nengeri (ADUN) Ba’Kelalan madah, taja pan PKR nengeri enda nemu pasal pekara ke dikerundingka nya, deka ngelanggur tiga pekara ti chukup beguna iya nya sepeneka milih jalai pengarap, pelajar enggau pengari dalam Parlimen.
Ambika chunto ku iya, hal jalai pengarap baka dalam Jadual 9, Perlembagaan Persekutuan, nyebut undang-undang Islam iya nya dibaruh Rintai Nengeri.
“PKR minta Perintah Besai dikeingatka pasal pekara tu…Opis Pengerejista Bansa nadai kuasa merintah tauka malut diri dalam pekara tu lalu pekara nya patut tampak,” ku iya.
Pasal autonomi pelajar, Baru ngarapka Kepala Menteri tegap penemu ti madah dekaka pelasar  jaku  ba pelajar iya nya Jaku Inggeris enggau autonomi nyengkaum polisi enggau silibus pelajar nya.
Lalu pengari dalam Parlimen ku iya, patut diberi pulai baru ngagai satu pertiga tauka 34 peratus ari penyampau semua kaban parlimen, iya nya ari nengeri Borneo baka ti dipadah dalam genteran 165 enggau 190 (g) Ripot Suruhanjaya Cobbold.
Nitihku iya, diatu pengari Sabah enggau Sarawak dalam Parlimen majak kurang ngagai 25 peratus.
“Kami ngansak Kepala Menteri nentuka penyampau asal sebedau iya nya 34 peratus diberi pulai baru ngagai Sabah enggau Sarawak setipak enggau polisi penyampau sitak Parlimen di Semenanjung Malaysia enda ulih lebih dua pertiga penyampau semua,” ku iya.
Ku iya bejaku baru, ke penudi bendar penyampau pengari ari Sabah enggau Sarawak bisi 34 peratus dalam Parlimen, iya nya ba taun 1964.
BP

0 komentar: