KANOWIT: Asi pulut ti dichampur enggau chiping ti digaga Georgiana Lenggu ke lalau ditaruh iya dalam kebuk lebuh seminggu ke udah,berengkah ngemansutka bau.
Ari bau nya iya nemua udah datai ba maya nuangka ai mati enggau gula ngagai beram tuak ti digaga iya.
Beram nya tadi deka ngemansutka ai tuak ti nyamai asai ke disadung ngagai temuai ti datai ngabang.
Georgiana peranak Rumah Ejau Ikok ba Nanga Nirok di Sungai Ngemah ke manjai 14 pintu, udah nyendiaka diri ngintu Gawai Dayak kena 1 enggau 2 Jun.
Baka indu Iban ba rumah panjai nya, iya ke beumur ngelui 40 belajar ngaga tuak making ari indai iya, pengelandik ti diturunka kenya ari aki ini kelai menya.
“Taja pia bisi pantang maya ngaga tuak. Enti pansang nya bisi dilanggar,asai ati tuak nya deka berubah.
“Ambika chunto, bala indu enda dikemendar ngaga tuak maya sida datai kain tauka utai bukai enggai tuak ke digaga sida jai,” ku iya.
Iya iya mega ngajar nentuka chiping ti dikena ngaga beram tuak nya rangkai endar sebedau digulai enggau asi pulut ke udah chelap, enggaika ai tuak bebali masam.
“Kelimpah ari nya, anang negu beram tuak ti ditaruh dalam kebuk pengudah negu pemakai ke bisi asai masam lalu anang bejaku mayuh maya ngaga tuak nya,” ku iya.
Ai tuak ke baru deka nampak keruh agi enti dibanding enggau ke lama udah digaga, ku iya.
Ku iya, ai tuak deka berasai bisa agi enti lama ditaruh.
Dalam kandang dua minggu ke deka datai, Georgiana madahka iya deka ngaga said kue chuan begulai enggau bala kaban belayan iya dirumah panjai nya.
Iya udah meli rengka ti deka dikena ngaga kuih nya lebuh ke meli barang ngagai pasar Kanowit beberapa hari ti udah.
“Ngintu Gawai di rumah panjai nya maya berambi enggau diri sebilik sereta bala kaban belayan ke bukai.
“Ba aku tu mih maya dipelaba ulih begulai sereta begempuru enggau semua diri sebilik laban tebal agi sida gawa di pasar enggau menua luar sereta semina ulih mulaika diri ke rumah maya Gawai,”ku iya.
Ku iya baka taun ke sebedau tu, pengerami Gawai di rumah panjai belabuh diintu sebedau tengah malam 1Jun.
Peranak rumah panjai begempuru di ruai mendingka pesan Hari Gawai sereta jaku lalau ari Tuai Rumah.
“Nemban tengah malam, tuai rumah lalu nguluka peranak rumah panjai nya ngirup ai pengayu.
“Nangkanka baru belabuh pengawa ngajat, ngirup, makai, belagu enggau sekda main bukai nyentukka pagi,”ku iya.
Borneo post
0 komentar:
Catat Ulasan