KUCHING: Sapit Kepala Menteri I, Datuk Amar Douglas Uggah Embas ngelalau semua organisasyen Dayak ngelengka bida runding lalu beserakup ungkup pemaik bansa Dayak.
Bejaku bejadi Bazar Gawai Dayak Kuching 2016, Uggah madah enti bida tu ulih dilengka, iya pechaya Dayak enda deka tinggal ari bansa bukai nyapai Wawasan 2020.
“Aku nemu portfolio ke diberi ngagai aku tu mai reti ke besai lalu aku begunaka sukung ari semua kita kelebih agi bansa Dayak.
“Nya kebuah, aku ngelalau semua organisasyen Dayak bela berandau sereta ngelengka bida runding ngambi kitai ulih sama bela mansang baka bansa bukai,” ku iya.
Uggah ke mega Menteri Betanam Betupi Moden enggau Ekonomi Menua Pesisir nambah, Kabinet Nengeri ke baru ditumbuh enggau Tim Adenan, baru udah menang ba Pengawa bepilih Besai Nenegri Ke-11(PRN11).
Nengah empat menteri Dayak dalam Kabinet Nengeri, pekara tu mandangka perintah maya ke diatu enda melakangka pemaik komuniti Dayak.
Bela begulai enggau Uggah dalam kabinet baru iya nya Tan Sri Datuk Amar Dr James Masing ke dichiri nyadi Sapit Kepala Menteri sereta Menteri Pemansang Infrastruktur enggau Pengangkut.
Dua iku agi menteri Dayak iya nya Dato Sri Michael Manyin Jawong ti megai portfolio Menteri Nembiak, Lumba enggau Penyerakup sereta Datuk Dr Stephen Rundi Utom ke nyadi Menteri Perengka Guna Mensia Mayuh.
Dulu agi ari nya, Uggah ngambi peluang meri basa ngagai Ex-Sapit Kepala Menteri, Datuk Patinggi Tan Sri Alfred Jabu Numpang ketegal ti udah mayuh meri jasa ba pemansang Dayak.
“Datuk Patinggi Jabu udah nyadi mentor aku lalu iya seiku ketuai ti chukup komited ba pengawa mantu komuniti Dayak.
“Berindik enggau nya, aku deka meri jaku terima kasih ungkup jasa sereta embing iya ngelamatu ti mega udah mantu aku bediri ditu,” ku iya.
Ngelaika sukung ngagai bazar nya, Uggah ngagihka RM30,000 ngagai pengatur pengawa Rogies Meringgai.
Mayuh macham produk enggau barang asil pengelandik Dayak nyengkaum pemakai, pekayan bisi dijual ba bazar nya.
Borneo post
0 komentar:
Catat Ulasan