KUCHING: Aum Kunsil Nengeri (DUN) Sarawak Ke-18 ungkup penggal keterubah deka berengkah 7 ngagai 15 Jun 2016, pengelama 7 hari enda nyengkaum Hari Enam (11 Jun) enggau Hari Minggu (12 Jun).
Speaker DUN Datuk Amar Awang Asfia Awang Nasar madah Rang Undang-Undang Bekalan Tambahan (2015/2016) deka dibantai Menteri Pekara Wang II Dato Sri Wong Soon Koh.
Ku iya, rang undang-undang nya deka dibantai Wong tiga kali iya nya keterubah kena 9 Jun, kedua 10 Jun lalu ke penudi 13 Jun.
Kelimpah ari nya Asfia mega madah tiga bengkah moseyen deka dipejurai rambau aum lalu dibai dua iku kaban Kunsil Nengeri (ADUN) ari penyakal.
“Ketetiga mosyen nya dibantai ADUN Batu Lintang See Chee How (dua mosyen) enggau ADUN Kota Sentosa Chong Chieng Jen (seiti mosyen).
“Mosyen nya dibantai nengah perintah 23 ke alai mosyen keterubah iya nya minta perintah mutar lalu negapka pengeran ngintu pemaik adan Sarawak ke deka dibantai See.
“Kedua ari See iya nya, minta komitmen Perintah Nengeri ngambi ulih mutar penusah bah ngenyit ke nyadi di Mengeri Kuching.
“Mosyen ketiga dibai Chong, minta Perintah Nengeri Sarawak ngemujur randau enggau perintah Besai ba sentang mulaika kuasa ngagai Sarawak enggau lengkas,”ku iya.
Iya mansutka jaku nya ba aum pengarang berita pengudah aum pra-DUN ke diatur ba Indu Opis parti Pesaka Bumipuetra Bersatu (PBB) di Jalai Bako ditu, kemari.
Kelimpah ari nya, Asfia mega madah semilan iku pengari rayat (YB) ke nadai beparti deka duduk begulai enggau pengari rayat sepiak Barisan Nasional (BN).
Ku iya, semilan iku sida menang ba pengawa bepilih ke baru tembu nengah tikit chalun terus BN lalu ketegal nya sida deka duduk begulai enggau pengari rayat BN ke bukai.
Bisi 336 tanya diterima ari pengari rayat ungkup aum DUN serak tu ke alai Opis Kepala Menteri nerima tanya ke pemadu mayuh iya nya 55 iti tanya.
Kelimpah ari nya bisi 269 saut (nengah jaku) enggau 65 saut betulis deka dibantai rambau aum.
Pengawa ngangkat sumpah ADUN deka diadu kena 7 Jun ke alai Tuai Pemegai Menua (TYT) deka ngenataika jaku kena 8 Jun lalu ditampung enggau petalat.
Borneo post
0 komentar:
Catat Ulasan