Jaku peransang ngambika terus ngemeratka pemansang ba kandang menua pesisir endang dikelalu kelebih agi lebuh pemutus pengawa bepilih nengeri ke baru tembu ngayanka sukung rayat ba kandang menua tunggang ngagai Barisan Nasional (BN).
Presiden Raban Bansa Tuai Iban Lundu, Pemancha Layang Engot madahka peminta Chairman Kelab Penyukung BN Sarawak, Abdullah Saidol rambau Aum Kunsil Nengeri (DUN) apin lama ke udah patut diperatika perintah.
Abdullah ke mega Kaban Kunsil Nengeri (ADUN) Semop meransang ngambika agih belanja khas ungkup pemansang menua pesisir dalam penyampau ke besai agi patut diberi perintah besai.
Ku Layang, peminta rayat menua pesisir ba pemansang perengka guna baka jalai alun, bekal elekterik enggau ai, sekula sereta ke bukai patut ditangkup.
“Nyadi peranak ke diau ba menua pesisir kitai endang bebendar nyukung pengawa perintah BN ti betuaika Kepala Menteri Datuk Patinggi Tan Sri Adenan Satem kelebih agi ngemansangka menua pesisir ngambika enda jauh tinggal ari mengeri.
“Ukai semina pelasar penyikap perengka guna, tang mega ke beguna endar baka sekeda program pemansang ti bekaul enggau modal mensia ngambika tikas ekonomi kami peranak menua pesisir ulih disungkak manah agi,” ku iya.
Tandu iya, pengawa dipejalaika bala pengari rayat ari menua pesisir baka Abdullah dikearap deka nyaup perintah ngenyampatka agi pemansang menua pesisir.
“Kualiti ketuai ke baka tu diguna kitai dalam bejalaika agenda perintah ngemansangka menua pesisir,” ku iya.
Adenan ngadaka Program Pemansang Menua Pesisir (RTP) ke alai dalam timpuh dua taun ke udah bemacham projek mit enggau jelan pemesai bekaul penyikap pelasar perengka guna dipejalaika enggau jampat ngena belanja perintah nengeri.
Layang mega enda nemu nama kebuah bisi sekeda orang enda setuju enggau agenda perintah ngemansangka kandang menua pesisir.
“Tu nyata nunjukka sida nya bisi agenda bukai ke enda sebaka enggau juluk perintah ti deka meda pemansang ba menua pesisir ng ambika enda jauh tinggal ari mengeri,” ku iya.
Borneo post
0 komentar:
Catat Ulasan