Pekara tu adil laban pengundi endang bisi kuasa ngaga pemutus ni bagi entiti politik pemadu engkeman ungkup sida (pengari rayat) ke nadai parti dalam parti Barisan Nasional (BN), pia ku Sapit Kepala Menteri Tan Sri Datuk Amar Dr James Masing.
Iya merambu mekanisme ti deka dipasuk ke dalam pekara nya ngambi beratika runding bala pengundi bepelasarka chara enggau prinsip ti udah dipesetuju bala ketuai Barisan nengeri sebedau pengawa bepilih – sebedau pemutus ulih digaga dikena milih ni bagi rumah kaban komponen BN ke deka disebilik enam iku pengari rayat ke dipilih.
Parti Rakyat Sarawak (PRS) nerima perambu ke digaga Kepala Menteri (KM) Datuk Patinggi Tan Sri Adenan Satem ngagai bala kaban kunsil nengeri tu ngambi berundingka kuing singkang sida nyereta Parti Pesaka Bumiputera Bersatu (PBB) sereta nanya bala pengundi sida sebedau ngaga pemutus ni bagi parti ke deka disereta.
“Tu pemutus ke manah iya nya nanya penemu bala pengundi ba konstituensi diarika sida empu mantaika penemu ni bagi parti ke patut dipasuk semilan iku (ADUN) nya.
“Tambah mega, pengundi ke milih pengari sida alai sida bisi diatu. Endang patut alai pengundi ngaga pemutus ni bagi parti BN ke patut dipilih sida.
“Tanya ke diatu iya nya mekanisme ngenataika pilih bala pengundi ngagai bilik ditama bala YB tu, pengudah beratika chara enggau prinsip dipesetuju sebedau Pengawa Bepilih Nengeri (PRN) Ke-11 tu tadi,” ku iya madah ngagai The Borneo Post kemari.
Ku Presiden PRS nambah, sebarang ADUN BN ke nadai parti dilaluka nyereta PRS enti sema bala pengundi deka baka nya.
“Pintu PRS seruran ditelenga ngagai pengari BN. Nya kebuah kaban PRS seruran bisi, nyengkaum aku empu, nyaup lebuhka diguna rambau pengawa bepilih tu tadi,” ku iya.
Adenan ke mega nyadi Chairman BN Sarawak sereta Presiden PBB meri timpuh ngagai semilan iku pengari nyentukka ujung bulan tu nanya penemu bala pengundi sida sebedau pulai ngagai PBB.
“Kami udah nanya semilan iku sida ke minta diri nyemilik PBB ngambika berunding baru ke pemutus sida sereta pulai ngagai bala pengundi lalu nanya nama pekara ke patut digaga sida.
“Enti sida, pengudah nanya bala pengundi, mengkang deka nyereta PBB, kami nadai pilih ke bukai tang nerima peminta sida nya,” ku iya rambau aum pengarang berita pengudah nyadi chairman aum supreme kunsil PBB kena Hari Minggu tu tadi.
Tiga ari semilan iku tu ex-kaban PBB ti ningkilka diri ari parti sebedau pengawa bepilih 7 Mei bediri nyadi chalun terus BN. Sida tu iya nya ex-kaban PBB Dato Gerawat Gala (Mulu), Miro Simuh (Serembu) enggau John Ilus (Bukit Semuja).
Tiga iku ex-Kaban Parti Tenaga Rakyat Sarawak (Teras) Tan Sri William Mawan (Pakan), Rosey Yunus (Bekenu) enggau Paulus Palu Gumbang (Batu Danau), lalu iya ke bukai iya nya ex-kaban Parti Bersatu Rakyat (UPP); Datuk Dr Jerip Susil (Mambong), Ranum Mina (Opar) enggau Dr Johnical Rayong Ngipa (Engkilili).
Pengudah pengawa bepilih tembu apin lama ke udah, PBB bisi 40 iti penuduk, dientudika PRS ngembuan 11 iti penuduk, Parti Sa’ati Rayat Sarawak (7) enggau Parti Demokratik Progresif Sarawak (3).
BN milih 13 iku chalun terus rambau pengawa bepilih tu tadi lalu 11 iku udah menang ba penuduk diperebut. Dua iku agi ke bukai iya nya Dato Sri Wong Soon Koh (Bawang Assan) enggau Datuk Tiong Thai King (Dudong).
Borneo post
0 komentar:
Catat Ulasan