Menteri Pengatur Pengeraja Asal enggau Rampa Menua, Datuk Amar Awang Tengah Ali Hasan enda lantang ati enggau insiden nimbak ti nabanka nyawa seiku aktivis di Miri, Bill Kayong kelimpah madahka pekara nya enda patut nyadi di nengeri tu.
Nitihku iya, insiden nya ngamahka nama Sarawak ti tebilang nyadi sebuah nengeri ti lantang sereta ngembuan toleransi tinggi ba raban bansa ti mayuh jalai pengarap enggau bansa.
“Pekara ke nyadi di Miri (insiden nimbak) ngujung nabanka nyawa seiku orang ketegal ulah orang ti enda berunding, tu pekara ti enda patut nyadi.
“Ke patut dalam pengidup kitai iya nya betulung, mantu sesama diri sekalika maya tusah tauka maya senang, nya kitai Sarawak tang lebuh pekara tu nyadi nya nyau baka raban bansa mafia,” ku iya.
Iya mansutka pekara nya lebuh bejaku ba pengerami nyuaka pemeri ninting taun Perbadanan Kemajuan Perusahaan Kayu Sarawak Sarawak (PUSAKA) ba Dewan Seminar, Wisma Sumber Alam ditu,ensanus.
Berindik ari pekara nya Awang Tengah madahka udah nyadi tanggungpengawa rayat nengeri nentuka ulah ti manah dalam pengidup ba pupu bansa enggau jalai pengarap ngambika insiden nya enda nyadi fenomena pengidup di Sarawak.
“Pekara ke nyadi nya ketegal nadai runding nyadi mensia, nadai agi akal deka berunding lalu tu mih raban bansa ke diseliahka kitai. Enti enda ulih ditagang tu ngerusak raban bansa kitai,” ku iya.
Dalam insiden nimbak mati Bill ti mega Sekretari Parti Keadilan Rakyat (PKR) Pampang Miri ditimbak lebuh ke benung deriba nurun ngagai endur iya gawa, kena Hari Dua apin lama udah.
Kelimpah ari nya lebuh ke ngenang pasal PUSAKA, iya madahka taja pan asil PUSAKA enggau anak kompeni iya nurun taun tu, sida nya tetap bejalaika aktiviti pengelantang pendiau di nengeri tu.
“Aku ngarapka pemeri tu ulih mantu gerempung enggau organisasyen ngatur aktiviti enggau mantu orang ti begunaka bantu di nengeri tu,” ku iya ti mega Menteri Pemansang Industri enggau Orang Dagang, Pengawa Dagang enggau Pemeranak Puku.
Ba pengerami nya, bisi 59 buah gerempung pengintu pengelantang pendiau enggau Gerempung Ukai Dikuasa Perintah (NGO) nerima pemeri sepenyampau RM266,000.
Sama bisi datai, Menteri Muda Pemansang Industri (Pemeranak Puku enggau Promosyen) Datuk Julaihi Narawi, Ahli Lembaga Pengurusan Pusaka Tan Sri Datuk Amar Abdul Aziz Husain, Datuk Yusuf Hadi, Menijer Besai Pengurusan PUSAKA Datu Sarudu Hoklai enggau pemesai ke bukai.
Borneo post
0 komentar:
Catat Ulasan