Jul 18, 2016

Adenan dekaka Sarawak nyadi champion SUKMA 2016


Kepala Menteri Datuk Patinggi Tan Sri Adenan Satem dekaka kontinjen Lumba Sarawak (SUKMA) 2016 bulih gelar champion ba pekit ke diatur berengkah 22 nyentuk 31 Julai di nengeri tu.
Bejaku rambau pengawa nyuaka menira Sarawak ngagai Chef-de-Mission di DeTAR Putra UNIMAS kemari, Adenan netapka penuduk lumur dua tauka lumur tiga ukai penuduk ke diining tang Sarawak dekaka gelar champion.
“Gelar champion kala dijapai kitai dulu suba, kitai ulih mujur sekali agi. Anang berundingka alah, perunding pekara ke ulih dikereja nuan enggau manah, ketegal kita ngembuan pengelandik sereta pengeran.
“Aku suah pechaya enti kitai deka ngereja pengawa, adu mih enggau manah enda ngira sekalika nuan kepala menteri, menteri besai tauka sida ke meresi uras ba jalai.
“Peranak Sarawak ngarapka kita semua, kita deka mai menira Sarawak lalu deka bepekit enggau naka pemanah,” ku iya bejaku ngagai sekeda atlit Sarawak ke nedat DeTAR Putra.
Ba pengawa kemari, Menteri Muda Nembiak enggau Lumba Datuk Abdul Karim Hamzah ke nyadi Chef de Mission kontinjen Sarawak nerima menira ari Adenan.
Ngenang kaul ke sama, Adenan madahka Perintah Nengeri deka nyendia insentif ngagai atlit nengeri ti bulih midul rambau Sukma 2016.
Ku iya, insentif duit nya deka diberi ngagai atlit ke bulih midul emas, perak enggau engkeraju.
“Udah tentu kitai deka meri insentif ngagai atlit ke udah ngangkatka nama nengeri. Insentif nya urung RM2,000 nyentuk RM5,000,” ku iya.
Iya mega madah deka datai ngemata sekeda lumba enggau main ke diatur lalu ngarap Lagu Nengeri Sarawak, Ibu Pertiwi Ku dimain suah agi rambau nya ila.
Sarawak kala nyapai gelar champion ba Sukma ke diatur dua taun sekali iya nya ba taun 1990, 1992 enggau 1994 ke alai ungkup taun 2016, Sarawak na-git teulihka 72 iti midul emas.
Bela datai bini Adenan Datin Patinggi Datuk Jamilah Anu, Sapit Kepala Menteri Tan Sri James Masing, Menteri Nembiak, Lumba enggau Penyerakup Dato Sri Michael Manyin, Menteri Opis Kunsil Kandang Menua Datuk Dr Sim Kui Huan enggau Sekretari Perintah Nengeri Tan Sri Datuk Amar Mohd Morshidi Abdul Ghani.

0 komentar: