Bujang Senang

Bujang Senang

Jul 19, 2016

Menteri ari Sarawak patut nyaup ngambi pulai kuasa


Raban menteri Sarawak ba kabinet Perintah Besai sereta orang gawa Perintah (senior) di Semenanjung Malaysia dipinta mantu atur pengawa mulaika kuasa ari Perintah Besai ngagai Perintah Nengeri.
Bejaku ba pengerami Gawai – Kaamatan 2016 Ke-10 ke diatur Balai Dagang enggau Industri Dayak (DCCI) begulai enggau Balai Dagang enggau Industri Kadazandusun (KCCI) di Kampung Budaya Sarawak malam ensanus, Adenan  madah sida patut seruran ngansak pekara ke bekaul enggau hak nengeri tu.
“Hak enggau pengelebih nya bisi dirintai dalam Sempekat Malaysia 1963, Akta Malaysia 1963, Ripot Komiti Entara Perintah (IGC), Konstitusyen Perintah Besai enggau Komiti Pemansik Cubbold,”ku iya ke nyadi Kepala Menteri.
Tebal agi orang gawa perintah di Semenanjung Malaysia ke ngadu proses tu bedau ada maya kelelima dokumen nya digaga, ku tandu Adenan.
Ngenang kaul ke sama, Adenan madah udah ngempuru raban orang ke landik ari nengeri tu ngambi ulih mantu proses kelebih agi ba sentang undang-undang enggau konstitusyen.
“Menteri Besai udah setuju nyiri Tuai Luyar Perintah (AG) berandau enggau ketuai luyar kitai lalu maya ke diatu randau nya udah diadu ke alai aku mega pechaya Sabah pan bisi ngatur randau ke sama,”ku iya.
Adenan enggau nyemetak madah Sarawak ukai deka ningkilka diri ari serakup dalam atur minta hak enggau pengelebih nya dipulaika baru, ti udah dikelaung dalam timpuh 53 taun.
“Malaysia sigi dikedeka kitai maya ketuai kitai ke dulu baka sida  Tun Jugah, Tun Abang Openg, Datuk Bandar enggau Ling Beng Siew nyain enggau nudukka Serakup Malaysia.
“Diatu kitai mengkang deka dalam Malaysia sereta Malaysia ungkup kitai jemah ila. Kitai sigi enda ningkilka diri ari Malaysia.
“Tang kitai enggai dikelaung, Sarawak ukai sebengkah nengeri dalam serakup ke alai Malaysia ditumbuh nengah sempekat ke digaga enggau basa,”ku iya.
Ketegal nya ku iya nambah, Perintah Nengeri udah setuju netapka 22 Julai ninting taun nyadi Hari Sarawak lalu nya dikena ngingat  raban ketuai ke dulu ti udah netapka pemutus nyereta Malaysia.
Ba pengerami nya, Adenan setuju nyendiaka tanah ngagai DCCI sebedau ujung taun tu ke dipinta presiden Datuk Joseph Salang Gandum dulu agi ari nya.
Presiden KCCI Bonipasius Bianis entara 700 iku pengabang ke datai nyengkaum 100 iku temuai ari Sabah.
Bela datai bini Adenan Datuk Patinggi Dato Jamilah Anu, Sapit Kepala Menteri Datuk Amar Douglas Uggah, Menteri ba Opis Menteri Besai Datuk Joseph Entulu Belaun, Menteri Penguasa Pemayuh Pengereja Pengawa Dato Sri Richard Riot enggau bala menteri ke bukai.

0 komentar: